Membro da xeración poética dos 80, que contribuíu radicalmente á renovación da poesía galega contemporánea, Xavier Seoane recompila e traduce nesta obra un conxunto significativo da súa produción. Poemario con diversidade de temas e rexistros, Eloxio de vivir recolle tanto a presenza atlántica e vigorosa da natureza e da paisaxe galegas, como a afirmación ontolóxica, a celebración da vida ou a reflexión elexíaca existencial ou amatoria.  A unha veta xenuinamente lírica súmanse poemas con alento social ou histórico, simbólico ou mítico, histórico ou cultural, epifánico ou antropolóxico. Crónica persoal e testemuña do vivido, sobre un poderoso escenario finistérrico, atlántico e telúrico, a súa obra envólvenos nunha espiral de tempo, da memoria e dos soños.